Rritet çmimi i bukës në Shqipëri – Qytetarët të shqetësuar, kërkojnë ndërhyrje urgjente

Rritja e çmimit të bukës ka shkaktuar reagime të forta në mbarë vendin, me qytetarët që shprehin shqetësime serioze për përballueshmërinë e produkteve bazë të konsumit. Sipas informacioneve nga tregu, pritet që çmimi i një njëse bukë të rritet deri në 20% në muajt në vijim, duke shkuar nga 60 lekë në 70 lekë.

Situata paraqitet edhe më alarmante në qytetin e Fierit, ku çmimi i bukës masive ka arritur në 150 lekë, me një rritje të menjëhershme prej 40 lekësh brenda një dite. Kjo rritje e papritur ka nxitur zemërim dhe pakënaqësi mes qytetarëve, të cilët kërkojnë ndërhyrjen e autoriteteve për të ndalur abuzimet dhe për të stabilizuar çmimet.

“Është e papërballueshme për një familje të zakonshme të përballojë këtë rritje. Kërkojmë sqarime dhe transparencë nga institucionet për këtë situatë”, shprehen qytetarët.

Në këtë kontekst, qytetarët i bëjnë thirrje qeverisë dhe institucioneve përkatëse që të japin shpjegime të qarta dhe të marrin masa për të parandaluar përkeqësimin e kushteve të jetesës, veçanërisht për shtresat më të ndjeshme të shoqërisë.